Бул тууралуу Turmush агенттигинин кабарчысы Чүй облусунун Ички иштер башкармалыгынын Жол кыймылынын коопсуздугун камсыздоо бөлүмүнүн басма сөз кызматынан маалым болду.
«131 жана 132 км аралыкта Суусамыр өрөөнүндө температура -38 градуска жетти. Мындай шарттарда инспекторлор жол кыймылынын коопсуздугун камсыздап, көйгөйлүү участкаларда кезектешип турушат», — деп айтылат билдирүүдө.
16-январдан 17-январга караган түнү сууктун кесепетинен кээ бир унаалар иштебей, кыймылын уланта алышкан жок. Натыйжада айдоочулар кыйын абалга туш болушту, инспекторлор аларга зарыл жардам көрсөтүштү.
Аба ырайынын кескин начарлашын эске алып, ведомство узак сапарга чыгуу пландап жаткан айдоочуларды өтө этият болууга чакырат. Аларга жол кыймылынын эрежелерин сактоону жана авариялык кырдаалдардан качуу үчүн чараларды көрүүнү катуу сунушташат», — деп кошумчалашты басма сөз кызматында.
17-январдагы маалыматка ылайык, саат 10:30да Суусамыр өрөөнүндө жана Төө-Ашуу ашуусунда температура -41…-45 градус болуп турат.
