Жолугушуунун күн тартибинде «жашыл мектептер» регионалдык платформасынын концепциясын талкуулоо болду, аны «Балдар, жаштар жана климат» тегерек столунун алкагында жогорку деңгээлде бекитүү пландалууда. Катышуучулар ошондой эле региондогу экологиялык чакырыктарды эске алуу менен климаттык өзгөрүүлөргө туруктуу билим берүү системаларын кантип түзүү керектигин карашты.
Иш-чаранын жүрүшүндө Жусупбекова Кыргызстандагы билим берүүнү экологиялаштыруу боюнча реформалардын учурдагы абалы тууралуу маалымат берди. Ал билим берүү инфраструктурасынын ресурстарды үнөмдөө, коопсуздукту жогорулатуу жана климаттык туруктуулукка басым жасалганын, ошондой эле экологиялык темаларды окуу программаларына интеграциялоого көңүл бурулуп жатканын белгиледи.
Анын айтымында, өлкөдө климаттык өзгөрүүлөргө туруктуу 120 мектептен ашык иштеп жатат, энергияны үнөмдөө боюнча бир катар долбоорлор аткарылууда, курулуш нормалары жаңыланууда жана «жашыл мектептер» үчүн стандарттар иштелип чыгууда.
