Кыргыз футбол федерациясы (КФФ) Азия футбол конфедерациясына (АФК) 2028-жылы U-23 Азия Кубогун өткөрүү үчүн расмий арыз берди. Бул чемпионат континенттеги эң маанилүү жаштар турнири болуп саналат жана Азиядан 16 күчтүү олимпиадалык команда жыйналат.
Кыргызстан өз арызында эл аралык стандарттарга жооп берген стадиондорду, заманбап машыгуу базаларын, өнүккөн мейманкана инфраструктурасын жана эффективдүү транспорт логистикасын камтыган концепцияны сунуштады. КФФ мындай масштабдуу чемпионатты өткөрүү өлкөнүн футбол инфраструктурасын модернизациялоону тездетүүгө, анын эл аралык статусун жогорулатууга жана жаштарды спортко тартууга жардам берет деп белгилейт.
Турнирди өткөрүү укугу үчүн атаандаштык жогору болот, анткени Кыргызстандан тышкары Иордания, Япония, Катар, БАЭ жана Өзбекстан да арыз беришти.
2-марттан 6-мартка чейин АФКнын инспекциялык комиссиясынын Кыргызстанга визити күтүлүүдө. Комиссиянын мүчөлөрү жергиликтүү инфраструктуранын даярдыгын баалашат, андан кийин турнири өткөрүү үчүн акыркы чечим кабыл алынат. КФФ бул долбоорду улуттук футболду өнүктүрүү жана жаш оюнчулардын эл аралык аренадагы деңгээлин жогорулатуу үчүн стратегиялык мааниге ээ деп эсептейт.
