Студенттердин практикалык даярдыгын жакшыртуу пландалууда
Кыргыз Республикасындагы Пакистан Республикасынын Өзгөчө жана ыйгарым укуктуу элчиси Алтамаш Вазир Хан саламаттыкты сактоо министринин орун басары Темирбек Эркинов менен жолугушуу өткөрдү. Бул тууралуу министрликтин басма сөз кызматынан билдиришти.
Жолугушуунун жүрүшүндө саламаттыкты сактоо жана медициналык билим берүү тармагындагы кызматташтыктын маанилүү аспекттери каралды.
Жолугушуунун катышуучулары Кыргызстандын медициналык мекемелеринде билим алып жаткан пакистандык студенттер үчүн медициналык билим берүүнүн сапатын жогорулатуу маселелерине өзгөчө көңүл бурушту.
Тараптар академиялык байланыштарды күчөтүүнүн, билим берүү стандарттарын жакшыртуунун жана студенттер үчүн практикалык даярдыкты кеңейтүүнүн зарылдыгын белгилешти.
Мындан тышкары, эки өлкөнүн медициналык университеттери жана саламаттыкты сактоо мекемелери ортосунда түз байланыштарды өнүктүрүү, дарыгерлер жана окутуучулар арасында тажрыйба алмашуу, ошондой эле биргелешкен илимий иш-чараларды уюштуруу маселелери талкууланды.
