Бул факт текшерүү учурунда аныкталды
Ош жана Жалал-Абад облустарына болгон жумушчу сапарында саламаттык сактоо министри Дамирбек Осмонов медициналык буюмдардын жана дары-дармектердин электрондук маалымат базасынын ишин текшерди. Министрликтин басма сөз кызматы бул окуя тууралуу маалымдады.
Текшерүү Жалал-Абад облустук клиникалык ооруканасынын базасында жүргүзүлүп, ОсОО «Неман-Фарм» дарыканасында электрондук системада эсепке алынбаган препараттар табылды.
Бул маселе боюнча атайын адистер тиешелүү акт түзүп, аныкталган мыйзам бузууларды каттоого алышты.
Министр дары-дармектердин милдеттүү катталуусу жана санариптик көзөмөлдөөнү фармацевтикалык ишмердүүлүктүн бардык катышуучулары, алардын уюштуруу-укуктук формасына карабастан, сактоосу керек экенин баса белгиледи.
