17 жашка чейинки жаштар арасында спорттук күрөш боюнча өлкө чемпионатынын ачылышы 5-февралда Каба уулу Кожомкул атындагы спорт сарайында өттү, деп билдирди Кыргызстандын Физикалык маданият жана спорт мамлекеттик агенттиги.
Иш-чарада аталган агенттиктин орун басары Улан Кыдырбаев, ошондой эле Кыргызстандын Күрөш федерациясынын өкүлдөрү, машыктыруучулар, күрөшчүлөр жана алардын күйөрмандары катышты.
Улан Кыдырбаев саламдашуу сөзүндө жаш спортчуларды мелдештин башталышы менен куттуктап, аларга ийгилик жана жогорку натыйжаларды каалады. Ал мындай иш-чаралардын жаштардын спорттук чеберчилигин жогорулатуу жана улуттук команда үчүн резерв түзүү үчүн маанилүүлүгүн белгиледи.
Турнирдин жыйынтыгында биринчи үч орунду ээлеген спортчулар медалдар жана дипломдор алышат, ошондой эле 2026-жылга пландалган Азия, дүйнө чемпионаттарына жана эл аралык турнилерге катышуу үчүн Кыргызстандын командасына киргизилет.
Мелдештин биринчи күнүндө 17 жашка чейинки кыздар арасында 40, 43, 46, 49, 53, 57, 61, 65, 69 жана 73 кг салмак категорияларында беттештер өттү.
