Бүгүн Кыргызстанда 2008-2009-жылдары төрөлгөн жаштар үчүн бокс боюнча өлкө чемпионаты ачылды. Тиешелүү маалымат Кыргыз Республикасынын Физикалык тарбия жана спорт мамлекеттик агенттигинен алынды.
Ачылыш аземине «Ынтымак» олимпиадалык резерв мектебинин директору Рустам Ниязалиев жана Кыргыз Республикасынын Бокс боюнча улуттук федерациясынын аткаруучу директору Орозбек Евгачев катышты. Мындан тышкары, иш-чарада спортчулар, машыктыруучулар жана бокс күйөрмандары да болушту.
Турнирге Бишкек жана Ош шаарларынын өкүлдөрү, ошондой эле Чүй, Ош, Жалал-Абад, Нарын, Ысык-Көл, Талас жана Баткен облустарынан жана Бишкектеги Ш. Сыдыков атындагы Республикалык спорт колледжинин спортчулары катышууда.
Чемпионат эл аралык стандарттарга ылайык өткөрүлүүдө. Жаштар арасындагы мелдеш 10 салмак категориясын камтыйт: 50 кг, 55 кг, 60 кг, 65 кг, 70 кг, 75 кг, 80 кг, 85 кг, 90 кг чейин жана 90 кг ашык. Кыздар үчүн 9 салмак категориясы каралган: 48 кг, 51 кг, 54 кг, 57 кг, 60 кг, 65 кг, 70 кг, 75 кг жана 80 кг чейин.
Мелдештер 21-декабрга чейин уланат, ал эми жеңүүчүлөр чемпионаттын жыйынтыгы боюнча медалдар жана дипломдор алышат.
