28-ноябрда улутка кайрылуусунда президент Ермактын өз ыктыяры менен кызматтан кетүү тууралуу арыз бергенин билдирди. Зеленскийдин айтымында, согуш шарттарында жана тынчтык планы талкууланган учурда, өлкөгө "ички күч" издөө зарыл, бул ички биримдикти жана тышкы мамилелерди сактоого жардам берет. Ал бул үчүн "президенттик кеңсени кайра жүктөө" керектигин баса белгиледи, деп билдирет "Медуза" басылмасы.
Зеленский ошондой эле "Россия Украинадан ката кетирүүнү күтүп жатат" деп белгиледи. Ал украин тараптан мындай болбой турганын кепилдеди: "Биздин ишибиз уланууда, жана биз артка чегинүүгө же талаш-тартышка жол бере албайбыз. Биримдикти жоготуу, бизде бар болгондун баарын жоготууга алып келиши мүмкүн", - деди президент.
Axios басылмасынын украин булактарына таянып маалымдаганына караганда, Ермак кызматтан кетүү арызын АКШнын өкүлдөрү Стив Уиткофф жана Джаред Кушнер менен 29-30-ноябрда Майамиде өтө турган жолугушууга жакын убакта берген.
Андрей Ермак.
Андрей Ермак 2020-жылдын февралынан бери президенттин кеңсесинин жетекчиси кызматын аркалап келген жана Зеленскийдин эң жакын өнөктөштөрүнүн бири, ошондой эле өлкөдөгү экинчи маанилүү адам катары эсептелген. Жакында "Энергоатом" менен байланышкан коррупциялык скандалдын фонунда, оппоненттер жана союздаштар Зеленскийди Ермакты жумуштан бошотуу маселесин карап чыгууга чакырышкан. Бирок 20-ноябрда "Слуга народа" партиясынын мүчөлөрү менен болгон жолугушууда президент бул маселени карап чыгуу ниетин билдирген эмес.
28-ноябрдын таңында Ермактын кеңсесінде "Энергоатом" боюнча коррупцияга каршы териштирүү алкагында тинтүү жүргүзүлдү. Ал тергөө менен кызматташууга даяр экенин билдирди, бирок жыйынтыгында ага эч кандай айып коюлган жок.
