Жолугушуунун жүрүшүндө тараптар саясий, экономикалык жана транспорттук тармактарды камтыган эки тараптуу мамилелерди мындан ары бекемдөөгө байланыштуу көптөгөн маселелерди талкуулашты. Ошондой эле энергетика, инфраструктура жана маданий өз ара аракеттенүү боюнча биргелешкен долбоорлорду карашты.
Премьер-министр Шахбаз Шариф президент Жапаровду жылуу кабыл алып, анын жетекчилигинде Кыргызстандын оң экономикалык жетишкендиктерин белгиледи. Ал эки өлкөнүн гүлдөп-өсүшү үчүн биргелешкен аракеттердин зарылдыгын баса белгиледи.
Шарифтин айтымында, биргелешкен демилгелерди ийгиликтүү ишке ашыруунун натыйжасында, өлкөлөр өз ара сооданын көлөмүн жакынкы жылдарда $200 млн га чейин кыйла көбөйтө алышат.
Президент Жапаров, өз кезегинде, сүйлөшүүлөрдүн оң натыйжаларды алып келерине жана Кыргызстан менен Пакистан ортосундагы кызматташтыкты активдештирерине ишенимин билдирди.
Талкууланган темалардын бири транспорттук инфраструктураны өнүктүрүү боюнча биргелешкен иш алып баруу болду. Жолугушуунун катышуучулары Кытай, Кыргызстан жана Өзбекстан ортосундагы магистралдык темир жол долбоорлорун ишке ашыруунун маанилүүлүгүн белгилешти, бул региондун транзиттик потенциалын күчөтүүгө жардам берет.
Ошондой эле, эки өлкөнүн пакистандык деңиз порттору, мисалы, Карачи жана Гвадар аркылуу кызматташтыкты кеңейтүү ниети баса белгиленди, бул Кыргызстанды эл аралык рынокторго чыгуу үчүн жаңы мүмкүнчүлүктөрдү түзөт.
Мындан тышкары, Борбордук жана Түштүк Азиянын инфраструктурасын интеграциялоо жана энергетикалык коопсуздукту камсыз кылууда стратегикалык роль ойногон CASA-1000 регионалдык энергетикалык долбоору да талкууланды.
