Министрликтин маалымат кызматы тарабынан берилген маалыматка ылайык, тестирлөөгө математика, физика, химия, биология, география, информатика жана англис тили сабактарын окуткан педагогдор катышууда.
Тестирлөө 25-ноябрдан 30-ноябрга чейин өтөт. Бул иш-чаранын негизги максаты катышуучуларды ар кандай предметтер боюнча тест тапшырмаларынын форматы менен тааныштыруу. Бул тестирлөө даярдык мүнөзүнө ээ жана жыйынтык бааларга таасир этпейт.
Жыйынтык тестирлөө декабрь айына пландалган жана ал мугалимдердин кесиптик, мамлекеттик жана предметтик стандарттарды сактоосун, ошондой эле билим берүү процессине компьютердик технологиялардын интеграция деңгээлин текшерүүгө багытталган.
Министрликте бул тесттердин жыйынтыктары мугалимдердин айлыгына таасир этпей тургандыгын жана кандайдыр бир административдик чараларга алып келбестигин белгилешти.
Жыйналган маалыматтар негизги тестирлөөгө даярдык көрүү үчүн мүмкүн болгон кемчиликтерди аныктоо максатында талданат. Алынган жыйынтыктар негизинде мугалимдердин квалификациясын жогорулатуу жана кайра даярдоо үчүн жаңы модулдар иштелип чыгат.
