Табият министрлиги Чүй, Жалал-Абад жана Ош облустарында мыйзамсыз аңчылык менен алектенген жарандарды аныктоо боюнча рейддердин жыйынтыгы тууралуу маалымат берди. Бул тууралуу ведомствонун маалымат кызматы билдирет.
18-октябрда Кок-Арт капчыгайында Жалал-Абад облустук экотехнадзор кызматынын инспекторлору Түрк-Абад Барпин айылдык округунун тургуну И.Б.ны мыйзамсыз аңчылык кылгандыгы үчүн кармашты. Ага 263-берененин (Аңчылык эрежелерин бузуу) негизинде 12,5 миң сом өлчөмүндө айып пул салынып, белгиленди.
Бишкек жана Аламедин районундагы экотехнадзор кызматынын инспекторлору тарабынан жаңы техника колдонулуп өткөрүлгөн рейд учурунда дагы мыйзамсыз аңчылык фактысы катталды. Бузуучу 263-берененин негизинде 12,5 миң сом айып пулга жыгылды.
Ош облустук табигый аймактарды жана биологиялык ар түрдүүлүктү коргоо башкармалыгынын кызматкерлеринин, NABU уюмунун Барс-2 тобунун өкүлдөрүнүн жана жергиликтүү бийликтин биргелешкен иши Ноокат районундагы Чечме-Сай жана Чили-Сай аймактарында аңчылык эрежелерин бузгандарды аныктоого алып келди. Бул жарандар 263-берененин негизинде 12,5 миңден 25 миң сомго чейин айып пулга жыгылды. Кээ бир аңчылар менен түшүндүрүү иштери да жүргүзүлдү.
18-октябрда Кызыл-Суу Кара-Суй районунда Ош облустук табигый аймактарды жана биологиялык ар түрдүүлүктү коргоо бөлүмүнүн кызматкерлери жана NABU уюмунун Барс-2 тобунун өкүлдөрү аңчылык эрежелерин бузган жаранды кармашты. Анын айып пулы 263-берененин негизинде 12,5 миң сомду түздү. Аңчыларга жапайы жаратылышты коргоо боюнча сунуштар да берилди.
