2026-жылдын Bharat Electricity Summit иш-чарасынын алкагында Кыргыз Республикасынын энергетика министри Таалайбек Ибраев Индиянын KEC International Limited, NHPC Limited, NTPC Limited жана CraticAI Services Private Limited сыяктуу негизги энергетикалык жана технологиялык компанияларынын жетекчилери менен жолугушуулар өткөрдү. Бул тууралуу Кыргыз Республикасынын Энергетика министрлигинин басма сөз кызматынан маалымдалды.
Бул жолугушууларда Кыргызстандагы энергетика секторунда инвестициялык долбоорлорду ишке ашыруу мүмкүнчүлүктөрү талкууланды. Айрыкча, гидроэнергетиканы өнүктүрүү, жаңылануучу энергия булактарын киргизүү, көмүр өнөр жайын жана энергетикалык инфраструктураны модернизациялоо, ошондой эле санариптик жана инновациялык чечимдер жөнүндө сөз болду.
Переговорлордун натыйжасында Кыргыз Республикасынын Энергетика министрлиги менен KEC International Limited, ошондой эле CraticAI Services Private Limited ортосунда өз ара түшүнүшүү боюнча эки меморандумга кол коюлду, алар өз ара пайдалуу кызматташтыкты өнүктүрүүгө жана энергетика тармагында биргелешкен долбоорлорду иштеп чыгууга багытталган.
2026-жылдын 21-мартында министр NTPC Limited компаниясынын Нойдедеги күн энергиясы станциясын зыярат кылып, электр энергиясын өндүрүү боюнча заманбап технологиялар менен, ошондой эле энергияны узак мөөнөттүү сактоо чечимдери жана электр энергиясын топтоо боюнча жаңы ыкмалар менен таанышып чыкты.
Бул визит Кыргызстан менен индиялык компаниялардын кызматташтыгын кеңейтүүгө жана өлкөнүн энергетика секторун туруктуу өнүктүрүү үчүн алдыңкы технологияларды киргизүүгө болгон кызыгуусун тастыктады.
