«Биз бузулган түтүктү калыбына келтирүү үчүн бардык зарыл чараларды көрүп жатабыз. Учурда муниципалдык ишканасы «Таза-Булак», айыл башчылары, мугалимдер жана айыл өкмөтүнүн өкүлдөрү сыяктуу кошумча күчтөр тартылды», - деп белгилешти администрациядан.
«Таза-Булак» муниципалдык ишканасынын маалыматына ылайык, көйгөй жылуулук системасын мектеп менен байланыштырып турган суу түтүгүндө пайда болгон. Учурда адистер бул участокту жер астынан издеп жатышат, бул болсо зыяндарды аныктоо жана аварияны жоюу үчүн жер казуу иштерин жүргүзүүнүн зарылдыгын шарттады.
«Суук аба ырайы жана туманга карабастан, казуу иштеринин жүрүшү экинчи күнгө уланууда. Бул максаттар үчүн атайын техника тартылды», - деп кошумчалашты «Таза-Булак» МПдан.
Мурда Turmush агенттиги 13-январда Александровка айылындагы Исмаева атындагы орто мектепте жылуулук системасынын түтүгү жарылганын маалымдаган. Окуянын натыйжасында 13-январдан бери миңден ашык окуучу онлайн форматта билим алууга мажбур болушууда.
