Инвестор 2022-жылдын 25-ноябрында «Д.К.» менен Профсоюзная көчөсү, 125 дарегинде 15 кабаттуу турак жай куруу боюнча келишимге кол койгонун айтты. Бул үчүн ал Кыргызстанга атайын жабдуулар жана Түркиядан 30 курулуш жумушчусун алып келген.
Бирок, анын айтымында, «М» компаниясынын ээлери жана финансылык директор иштөө шарттарын камсыздабай, финансылык көйгөйлөргө шилтеме берип, ал жана анын жумушчулары алты ай бою айлык албай калган. Натыйжада, ал жумушчулары үчүн жатакана курууга мажбур болгон.
Кийинчерээк Халил «М» компаниясынын ээси менен жолугуп, ал бардык чыгымдарды калыбына келтирүүгө убада берип, Халил тарабынан берилген чыгымдардын тизмесине кол койгон.
Халилдин адвокаты Бурханедин Нурмаматовдун маалыматы боюнча, «Д.К.»га $150 миң суммада төлөм жүргүзүлгөн, ал эми «М» компаниясынын финансылык директору калган $352 миңди төлөөгө убада берген.
Сегиз ай Кыргызстанда болгон Халил Түркияга кайтып кеткен. Ал компаниянын ээси менен байланышууга аракет кылган, бирок ал анын номерин блоктоп койгон. 2023-жылы Октябрь РИИБине арыз берилген, ал эми 2025-жылдын 15-майында Халил Кыргызстанга кайтып келип, Ички иштер министрлигине кайрылган. Бирок ага кылмыш ишин козгоо боюнча баш тартылган, анткени «М» компаниясынын финансылык директору жана компаниянын ээлери аны тааныбай тургандыгын билдиришкен.
Адвокаттын айтымында, быйыл сентябрда кылмыш ишин козгоо боюнча баш тартуу чечими кабыл алынган. Зыян тарткан тарап ишти жарандык тартипте кароо үчүн сотко жөнөтүлгөн.
«Садыр Нургожоевич, ГКНБнын төрагасы Камчыбек Ташиев, мен сиздерден бул иш боюнча мыйзамдуу чараларды көрүүнү суранам», - деди Халил Келеш сөзүн жыйынтыктап.
