Нурбаев 30-октябрда шайлоого катышуу ниети тууралуу арыз берген. Бирок анын документтерин текшерүү учурунда 3-ноябрдагы Дин жана ултаралык мамилелер боюнча улуттук агенттиктин маалыматы жана 5-ноябрдагы кошумча маалыматтар, ошондой эле Мамлекеттик улуттук коопсуздук комитетинин маалыматы боюнча, Нурбаев 1983-жылдын 30-апрелинде туулган, узак убакыт бою диний ишмердик менен алектенген. Ал «Араван Зекет» диний кайрымдуулук фондунун директору болуп иштеген жана «Ас-Сафа» фондун өкүлү болгон.
2025-жылдын 26-сентябрындагы БШКнын токтому менен бекитилген №61 формасынын маалыматтарына ылайык, Нурбаев диний ишмер эмес экенин көрсөткөн жана мындай адамдар үчүн чектөөлөрдү сактоо боюнча декларацияга кол койгон. Ошентсе да, шайлоо документтерин кабыл алуу жана текшерүү боюнча жумушчу топ Нурбаевдин Жогорку Кеңештин депутаттыгына талапкер болуу үчүн мыйзам талаптарына жооп бербестигин аныктап, каттоодон өтүүдөн баш тартууну сунуштады.
2025-жылдын 5-ноябрында Нурбаев жумушчу топтун жыйынына катышты. «Президентти жана Жогорку Кеңештин депутаттарын шайлоо жөнүндө» конституциялык мыйзамдын 3-беренесинин 4-бөлүгүнө ылайык, диний ишмердик менен алектенген адамдар өздөрүнүн диний ишмердиги аяктаганынан кийин беш жыл бою депутаттыкка талапкер боло алышпайт.
Жумушчу топтун Нурбаевдин талапкер катары каттоого алынуу үчүн талаптарга жооп бербегендиги тууралуу жыйынтыктарына жана «Шайлоо жана референдумдарды өткөрүү боюнча Борбордук комиссия жөнүндө» конституциялык мыйзамдын 3-беренесинин 4-бөлүгүнүн 1-пунктуна, ошондой эле 3, 4 жана 8-беренелерине ылайык, Борбордук шайлоо комиссиясы Нурбаевди каттоодон баш тартты.
