Документтерди кабыл алуу жана текшерүү менен алектенген жумушчу топ Р. Асанова мыйзам тарабынан белгиленген талаптарга жооп бербейт деген жыйынтыкка келди. Атап айтканда, Мамлекеттик чек ара кызматы жана Мамлекеттик улуттук коопсуздук комитетинин маалыматына ылайык, Асанова акыркы беш жыл ичинде Кыргызстанда жашабагандыгы аныкталды, бул Кыргыз Республикасынын «Президентти жана Жогорку Кеңештин депутаттарын шайлоо жөнүндө» Конституциялык мыйзамынын 59-беренесинин 4-бөлүгүнө каршы келет.
Атап айтканда, ал 2021-жылдын 12-октябрынан 2022-жылдын 20-июнуна чейин өлкөнүн аймагында жок болгон. 2025-жылдын 22-октябрындагы жумушчу топтун жыйынында Рахима Асанова бул маалыматты тастыктады.
2025-жылдын 22-октябрындагы жумушчу топтун жыйынтыктарына ылайык Р. Асанованы Жогорку Кеңештин депутаты катары каттоого алуу мүмкүн эместиги, ошондой эле аталган Конституциялык мыйзамдын 59-беренесинин 4-бөлүгүнө жана Кыргыз Республикасынын «Шайлоо жана референдумдарды өткөрүү боюнча Борбордук комиссия жөнүндө» Конституциялык мыйзамынын 3, 4 жана 8-беренелерине ылайык, КРнын БШКсы Асанова Рахима Эргешалиевнаны көпмандаттуу округ №19 боюнча кандидат катары каттоодон баш тартуу чечимин кабыл алды.
