Өзбекстандын борбору Ташкентте Борбордук Азиянын айыл чарба министрлеринин жолугушуусу өттү. Бул маанилүү иш-чарада Кыргыз Республикасынын суу ресурстары, айыл чарба жана кайра иштетүү өнөр жайы министринин орун басары Асель Кененбаева катышты.
Бул жыйындын негизги максаты агроөнөржай комплексинин өнүгүүсүнүн негизги аспектилерин, азык-түлүк коопсуздугун камсыздоону жана региондогу кызматташтыкты бекемдөөнү талкуулоо болду.
Жыйындын жүрүшүндө делегациялар айыл чарбага байланыштуу улуттук программаларды ишке ашыруу боюнча тажрыйба алмашышты, ошондой эле инновациялык жана санариптик технологияларды талкуулашты. Агрардык секторду климаттын өзгөрүүлөрүнө ылайыкташтырууга, соода, илим, билим берүү жана инвестиция тармактарында кызматташууга чоң көңүл бөлүндү.
Кыргызстандын өкүлдөрү агроөнөржай комплексин өнүктүрүүнүн приоритеттүү багыттарына көңүл буруп, азык-түлүк коопсуздугу жана айыл чарба продукциясын кайра иштетүү маселелеринде регионалдык кызматташтыктын маанилүүлүгүн баса белгилешти.
Жолугушуунун жыйынтыгы менен Борбордук Азия өлкөлөрүнүн айыл чарба министрлеринин Биргелешкен декларациясы жана 2030-жылга чейин региондогу азык-түлүк коопсуздугун камсыздоо боюнча План кол коюлду. Бул документтер азык-түлүк коопсуздугун жакшыртуу, айыл чарбага инвестиция тартуу жана агрардык тармакта инновациялык технологияларды өнүктүрүү боюнча маанилүү кадам болуп калды.
Асель Кененбаева ошондой эле Өзбекстандын айыл чарба министри И.Ю. Абдурахмонов менен өзүнчө жолугушуу өткөрдү. Жолугушуунун жүрүшүндө тараптар Кыргызстан менен Өзбекстандын айыл чарба жана азык-түлүк камсыздоо тармагында кызматташтыкты өнүктүрүү боюнча Жол картасын ишке ашыруу жана келечектеги биргелешкен долбоорлорду талкуулашты.
Жолугушуунун соңунда эки тарап эки тараптуу кызматташтыкты тереңдетүүгө даярдыгын билдиришти, Жол картасынын жоболорун ийгиликтүү ишке ашыруу агрардык тармакта өз ара пайдалуу өнөктөштүктү бекемдөөнүн маанилүү куралы болоорун белгилешти.
