2026-жылдын 13-январында Жогорку Кеңештин эмгек, саламаттыкты сактоо, аялдардын укуктары жана социалдык маселелер боюнча комитетинин жыйынында электрондук сигареттер жана никотин камтыган продукцияларга байланыштуу эки мыйзам долбоорун кайтарып алуу чечими кабыл алынды.
Кайтарылып алынган мыйзам долбоорлору «Кыргыз Республикасында электрондук никотин жеткирүү системаларын жана электрондук сигареттерди колдонууга тыюу салуу жөнүндө» жана «Кыргыз Республикасындагы айрым мыйзам актыларына өзгөртүүлөрдү киргизүү жөнүндө» деген аталыштарга ээ. Экинчи долбоор «Кыргыз Республикасындагы жарандардын саламаттыгын тамеки, никотин жана чөйрөдөгү тамеки түтүнүнөн жана аэрозолдон келип чыккан кесепеттерден коргоо жөнүндө» мыйзамына жана укук бузуулар кодексине өзгөртүүлөрдү киргизүүнү сунуштайт.
Депутаттар бул документтер сунушталган пикирлер жана сунуштар эске алынып иштелип чыгарын белгилешти.
Мурда парламентте толук тыюу салуу мыйзамсыз жүгүртүүнүн көбөйүшүнө жана бюджетке салык түшүүлөрүнүн азайышына алып келиши мүмкүн экендиги боюнча кооптонуулар айтылган. Ошондуктан сооданы легалдаштырууну жана тиешелүү салыктарды төлөө менен жөнгө салууну карап чыгуу мүмкүнчүлүгү талкууланган.
