Жогорку Кенештин илим, билим, инновациялык өнүктүрүү, маалыматтык технологиялар, маданият, спорт жана жаштар иштери боюнча комитетинин жыйынында Кыргыз Республикасынын «Мажбурлуу мамлекеттик социалдык камсыздандыруу максатында жарандардын персонификацияланган (жеке) эсепке алуусу жөнүндө» мыйзамына өзгөртүүлөрдү киргизүү боюнча мыйзам долбоору каралып, жактырылды. Бул чечим биринчи окууда кабыл алынды.
Бул мыйзам долбоорунун демилгечиси өкмөт башчы болуп саналат.
Цифрдык өнүктүрүү жана инновациялык технологиялар министринин орун басары Нурсултан Кубанов мыйзам долбоорун иштеп чыгуудагы максат — Кыргыз Республикасынын жарандарына, чет элдиктерге жана жарандыгы жок адамдарга идентификациялык номерлерди берүү процессин жөнгө салуу жана ички карама-каршылыктарды жоюу экенин белгиледи.
Талкуу учурунда депутат Сеидбек Атамбаев персонификацияланган идентификациялык номерди берүүдө техникалык каталарды оңдоо механизмдери тууралуу суроо көтөрдү. Депутат Санталат Аманова бул процесске жооптуу мамлекеттик органды так аныктоонун маанилүүлүгүн белгиледи. Гулшаркан Култаева эски идентификациялык номер алмаштырылганда же каталарды оңдосо, анын тарыхын сактоо маселесин сурады. Советбек Рустамбек уулу чет элдик жарандарга жана жарандыгы жок адамдарга идентификациялык номерлерди берүү эрежелери тууралуу суроо көтөрдү.
Комитеттин төрайымы Токтобубу Ашымбаева ар кандай министрликтер жана ведомстволор ортосунда маалыматтык базаларды интеграциялоонун зарылдыгына көңүл бурду.
