Бул келишим 2025-жылдын 11-июлунда Бишкекте Кыргыз Республикасы менен Эл аралык өнүктүрүү ассоциациясы, ошондой эле пандемияларга каршы алдын алуу, даярдык жана жооп берүү үчүн арналган Трасттык фонддун администратору катары иш алып барган Эл аралык реконструкция жана өнүктүрүү банкынын ортосунда кол коюлган.
Мыйзам долбоорун өкмөт башчы сунуштады. Суу ресурстары, айыл чарба жана кайра иштетүү өнөр жайы боюнча орун басар министр Жаныбек Керималиев мыйзамдын калктын жана жаныбарлардын ден соолугун жакшыртууга, ошондой эле өлкөнүн экологиясын коргоого багытталганын белгиледи.
Анын айтымында, «1-фаза» долбоору зооноздук инфекциялар менен күрөшүүгө, антимикробдук препараттарга туруктуулукту алдын алууга жана азык-түлүк коопсуздугун камсыздоого багытталган үч негизги компонентти камтыйт.
Бул долбоорду ишке ашыруу үчүн 30 миллион доллар кредиттик каражат түрүндө, ошондой эле 1,79 миллион доллар грант түрүндө каржылоо каралган. Кредиттик каражаттар 50 жылдык мөөнөткө, он жылдык жеңилдик мезгили жана нөл пайыздык ставканы менен берилет.
