Депутат Болот Сагынаев азык-түлүк коопсуздугун камсыздоонун маанилүүлүгүнө, анын ичинде азык-түлүктүн сапаты жана коопсуздугу боюнча маселелерге көңүл бурду жана билим берүү мекемелеринин жанында коопсуз эмес тамак-аш товарларын сатууга тыюу салууну сунуштады.
Ошондой эле депутат Жылдыз Эгенбердиева аймактарда ветеринардык лабораторияларды модернизациялоо, куруу жана жабдуу зарылдыгын белгиледи.
Депутат Махабат Мавлянова органикалык азыктарды сертификаттоо жана текшерүү менен байланышкан маселелерди көтөрүп, Кыргызстанда колдонууга тыюу салынган кооптуу химикаттар жана пестициддердин тизмесин тактады.
Депутат Камила Талиева ветеринардык лабораторияларды модернизациялоо жана жабдуу маселесинин актуалдуулугун, айрыкча Баткен облусунун Лейлек районунда, баса белгиледи. Ал ошондой эле кредиттик жана гранттык келишимдердин шарттарын тактап, бул келишимдердин алкагындагы иш-чаралардын бирдей экенин белгиледи.
Суу ресурстары, айыл чарба жана кайра иштетүү өнөр жайы министринин орун басары Жаныбек Керималиев, мыйзам долбоорун сунуштап, «1-фаза» долбоору үч негизги компонентти камтыйт: зооноздук инфекциялар менен күрөшүү, антимикробдук препараттарга туруктуулукту алдын алуу жана азык-түлүктүн коопсуздугун камсыздоо. Жалпы каржылоо 31,79 миллион долларды түзөт, анын ичинен 30 миллион доллар 50 жылдык мөөнөт менен 0% пайыз менен 10 жылдык жеңилдик мезгили менен кредит түрүндө берилет, ал эми 1,79 миллион доллар грант түрүндө берилет.
