Университеттин маалыматына ылайык, операциянын пациенттери 50 жаштагы Бурулкан Курбаналиева болуп, ал сегиз жылдан бери бүйрөк оорусунан жабыркаган. Операциянын донору анын 25 жаштагы уулу болду. Учурда эненин жана донордун абалы туруктуу, экөө тең медициналык адистердин көзөмөлүндө.
Процедура акысыз өткөрүлдү. Операцияны жүргүзгөн хирург ОшГУнун доктуру Бексултан Сейтбек уулу болуп, ал Россиядан чакырылган врачтар менен кызматташып иштеди. Бул президент Садыр Жапаровдун трансплантологияны өнүктүрүү боюнча демилгелеринин жана Саламаттык сактоо министрлигинин колдоосунун натыйжасында мүмкүн болду.
19-декабрда операциядан кийин Саламаттык сактоо министри Каныбек Досмамбетов пациентти зыярат кылды. Ал түштүк региондогу медициналык илимдин өнүгүшү үчүн мындай татаал операциялардын маанилүүлүгүн белгилеп, саламаттык сактоо мүмкүнчүлүктөрү дагы да кеңейе берерин айтты.
Министр иш сапары учурунда клиниканын, Эл аралык медициналык факультеттин жана «Ак-Буура» кампусундагы окуу-лаборатория корпустарынын иши менен таанышты, ошондой эле окутуучулар жана студенттер менен жолугушту.
Клиникада бүйрөк трансплантациясын жүргүзүү үчүн бардык керектүү шарттар түзүлгөн. Операция залдары заманбап жабдуулар, пациенттердин абалын мониторингдөө системалары, жасалма дем алдыруу аппараттары жана операциядан кийинки толук көзөмөл жүргүзүү үчүн реанимация бөлүмү менен жабдылган.
Мурда бул клиникада бүйрөк трансплантациясы, жүрөктү стенттөө жана тукум куучулук кемчиликтерди оңдоо операциялары жүргүзүлдү. Хирургия бөлүмүндө 110 операция, анын ичинде 20 кардиохирургиялык кийлигишүү жүргүзүлүп, 82 пациент эндоваскулярдык метод менен операциядан өттү. Амбулатордук жардам 6 миңден ашык пациентке көрсөтүлдү.
