// ТАСС
30-октябрда Пусан шаарында, Корея Республикасында, Си Цзиньпин менен Дональд Трамптын жолугушуусу өтөт, деп билдирет Кытайдын Тышкы иштер министрлигинин сайты.
Маалыматта: «Эки өлкө ортосунда жетишилген келишимдерге ылайык, Кытай Эл Республикасынын төрагасы Си Цзиньпин АКШнын президенти Дональд Трамп менен жолугат» деп айтылат.
Жолугушууда лидерлер эки тараптуу мамилелерди, ошондой эле «жалпы кызыкчылык жараткан темаларды» талкуулайт деп болжолдонууда.
Трамп 1-октябрда Truth Social платформасында Си Цзиньпин менен болгон сүйлөшүүлөрдү жарыялап, «Төрт жумадан кийин мен Кытай президенти Си менен жолугам» деп билдирди.
Ал ошондой эле Кытайды америкалык айыл чарба продукциясын сатып алууга милдеттендирген келишим тууралуу маселе көтөрүүнү пландап жатканын белгиледи.
