АКШнын президенти Дональд Трамп Fox News эфиринде америкалык күчтөрдүн жакын арада мексикалык наркокартелдерге каршы жердеги операцияларды баштай турганын билдирди. «Биз азыр эле чабуулдарды баштайбыз. Картелдер Мексиканын бардык жерин көзөмөлдөп жатат», — деди ал. Трамп ошондой эле АКШ азырынча деңиз аркылуу келүүчү наркотиктердин 97%ын токтотуп, эми жердеги аракеттерге даярданып жатканын кошумчалады.
Сентябрдын башынан бери АКШнын куралдуу күчтөрү Венесуэла жээгиндеги кемелерге активдүү чабуул жасап жатышат, алар Трамптын айтымында, наркотик ташуу менен алектенишет. 3-январга караган түнү америкалык аскерлер Каракаска чабуул жасап, Венесуэланын президенти Николас Мадуро жана анын жубайы Силия Флоресди кармап алышты. Трамп наркокартелдерге каршы операцияларды Латин Америкасынын жана Кариб бассейнинин бардык аймагына, анын ичинде Мексика жана Колумбияга чейин кеңейтүү мүмкүнчүлүгүн четке каккан жок.
