Гренландиянын америкалык штатка айлануу мүмкүнчүлүгү бар
Флоридадан келген республикачыл депутат Рэнди Файн АКШ Конгрессинин өкүлдөр палатасында Гренландияны Америка Кошмо Штаттарына аннексиялоо боюнча мыйзам долбоорун сунуштады. Бул тууралуу ТАСС маалымат агенттиги анын расмий сайтында жарыяланган билдирүүгө таянып маалымдады.
Эгер мыйзам долбоору кабыл алынса, АКШнын президенти «Гренландияны аннексиялоо же башкача жол менен АКШга кошуу үчүн Дания Королдугу менен сүйлөшүүлөрдү жүргүзүү сыяктуу зарыл кадамдарды жасоого» укук алат. Ошентип, Гренландия АКШнын штаты болуп таанылышы мүмкүн.
Файндын айтымында, бул мыйзам чыгаруу демилгеси «Арктика аймагында АКШнын улуттук кызыкчылыктарын коргоого жана Кытай менен Россия тараптан өсүп жаткан коркунучтарга каршы турууга» багытталган.
Эскерте кетсек, президент Дональд Трамп мурда Гренландияны АКШга кошуу зарылдыгы жөнүндө билдирген. Ал биринчи президенттик мөөнөтүндө аралды сатып алууну сунуштаган жана 2025-жылдын мартында аннексия мүмкүнчүлүгүнө ишенгенин билдирип, Данияга соода бажы салыктарын киргизүү менен коркуткан. Бирок дат премьер-министри Метте Фредериксен бул дооматтарды кескин түрдө четке каккан, Гренландиянын королдуктун бөлүгү экенин баса белгилеген.
Гренландия Даниянын ичинде автономдуу аймак катары иштейт. 1951-жылы Вашингтон менен Копенгаген арасында Гренландияны коргоо боюнча келишимге кол коюлган, ал НАТОнун алкагындагы милдеттенмелерден тышкары, аралды мүмкүн болгон тышкы коркунучтардан коргоону камтыйт.
Сүрөт www
