Трагедия 2025-жылдын 28-октябрында, Бишкектеги Шабдан-Баатыр проспектинде, 04:00дө болуп өттү. 2008-жылы туулган өспүрүм айдоочу "Тойота-Сиенна" маркасындагы унаа менен электр мамысына сүзүп кетти. Бул тууралуу шаардык Ички иштер башкармалыгынын маалымат кызматы билдирет.
Кырсыктын натыйжасында, окуя болгон жерде эки жүргүнчү: 2008-жылы туулган З.Н. жана 2007-жылы туулган А.Н. көз жумду. Ар кандай жаракат алган айдоочу тез арада ооруканага жеткирилди.
Бишкек шаардык Ички иштер башкармалыгынан алынган маалыматка ылайык, бул окуя каттоочу журналга катталган жана учурда тергөө иштери жүргүзүлүүдө, зарыл экспертизалар дайындалган.
УПСМдин маалымат кызматынын өкүлдөрү, өспүрүм унааны ата-энесинин уруксатысыз башкарганын жана айдоочулук күбөлүгү жок экенин белгилешти. Тийиштүү органдар ата-энелерди балдарын көзөмөлдөп, өспүрүмдөрдүн транспорт каражаттарына кирүүсүн алдын алууга чакырышты.
