Алаяктар аялдын ишенимин алдап алып, Кара-Балтадагы банктардын биринен 400 миң сом суммада кредит алууга көндүрүшкөн. Каражатты алган соң, жабырлануучу 393 миң сомду алаяктар көрсөткөн банктык эсепке которгон.
Окуя боюнча Кыргыз Республикасынын Кылмыш-жаза кодексинин 209-1-беренеси «Электрондук төлөм каражаттарын, виртуалдык активдердин капчыктарын жана SIM-карталарды үчүнчү жактарга атайылап өткөрүп берүү же сатуу» боюнча кылмыш иши козголду, деп билдирет маалымат кызматы.
Оперативдик иш-чаралардын жүрүшүндө шектүү катары 2007-жылы туулган Бишкек шаарынын тургуну А.А. аныкталды. Ал өз ыктыяры менен тергөөчүлөргө банк картасын өткөрүп берген. Жаш жигит мурда Visa пластик картасын жана SIM-картасын ачып, аларды Telegram аркылуу тааныш эмес адамдарга 4,5 миң сомго саткан. Бул маалыматтарды алаяктар жабырлануучуга карата алдамчылык аракеттерин жасоо үчүн колдонушкан, бул анын акча каражаттарын уурдоого алып келген.
Чүй облусунун ГУВДсынан сүрөт. Дроппер
Ошентип, А.А. бөтөн адамдарга интернет-банкингине жана мобилдик тиркемелерине толук кирүү мүмкүнчүлүгүн берген, бул дагы кылмыш катары бааланат. Кыргыз Республикасынын Кылмыш-процессуалдык кодексинин 96-беренесине ылайык, ал кармалып, убактылуу кармоо жайына жайгаштырылды. Райондук сот жаш жигитти камакка алуу боюнча чечим кабыл алды. Тергөө иштери уланууда.
Чүй облусунун ГУВДсы SIM-карталарды, банк карталарын жана башка электрондук төлөм каражаттарын үчүнчү жактарга өткөрүп берүү кылмыш жоопкерчилигине тартылуучу аракет экенин эскертет.
