Свердлов районунун Ички иштер башкармалыгынын тергөө бөлүмүнүн орун басары Лира Жыргалбекованын берген маалыматына ылайык, райондук ИИБде шайлоочулардын добуштарын сатып алуу боюнча 196-беренеге ылайык ачылган кылмыш ишинин тергөөсү уланууда.
Жыргалбекова Гульназ Халилованын бул кылмышка катыштыгын көрсөтүп турган ишенимдүү далилдер жыйналганын билдирди. Ал добуштарды сатып алуу схемасын уюштурган. Бир тарапкерге жана эки үгүтчүүгө сыртка чыкпоо тууралуу чара көрүлгөн. Текшерүү учурунда шайлоочулардын тизмелери жана 7 миллион 159 миң сомдук акча каражаттары алынган», — деди ал.
Ал ошондой эле Гульназ Халилованы кылмыш жоопкерчилигине тартууга макулдук берүү өтүнүчү менен чыкты, ага ЦИКтин бардык мүчөлөрү оң жооп беришти.
Бишкек шаардык Ички иштер башкармалыгынын улук тергөөчүсү Бахтияр Эдильбек уулу Лира Акуновага байланыштуу добуштарды сатып алуу боюнча 23-октябрда козголгон иш тууралуу да айтып берди.
«Тергөө аракеттеринин жүрүшүндө шайлоо процессине мыйзамсыз таасир этүү боюнча жетиштүү далилдер жыйналды. Лира Акунова кызы Салтанат Исманованы финансылык өкүл катары каттатып, ал өз кезегинде өзүнүн тууганы Шаабидин Токтосартовду добуштарды сатып алуу схемасына тарткан. 8 жана 12-ноябрда Акунованын көрсөтмөсү боюнча, анын кызы Токтосартовго шайлоочулар арасында бөлүштүрүү үчүн 360 миң сом берген. Акунова ГУВДга көрсөтмө берүү үчүн чакырылган, бирок бардык чакырууларды игнор кылган», — деди тергөөчү.
ЦИК ошондой эле Лира Акунованы кылмыш жоопкерчилигине тартуу боюнча өтүнүчтү канааттандырды.
Эки шектүү, Гульназ Халилова жана Лира Акунова Бишкек шаардык кенешинин депутаттары болуп саналат.
