Жайыл районунда жашы жете элек кызды никеге туруу максатында уурдоо боюнча бир нече жаш жигиттер кармалды, деп билдирет Чүй облусунун ИИБи.
Маалыматтарга ылайык, 2025-жылдын 22-декабрында саат 21:00 чамасында Аламудун районунун ИИБине Васильевка айылында 2008-жылы туулган К.Х. аттуу жашы жете элек кыз уурдалганы тууралуу маалымат келип түшкөн. Маалыматтар боюнча, аны белгисиз адамдар күмүш түстөгү унаа менен алып кеткен.
Окуя катталгандан кийин, ориентировка ишке киргизилип, Чүй облусунун ИИБинин УОБДД кызматкерлери Сосновка айылындагы көзөмөл-өткөрүү пунктунда күмүш түстөгү Honda Step унаасын токтотушкан. Унаада 2008-жылы туулган К.Х. жана башка жаш жигиттер: 2005-жылы туулган Б.А., 2001-жылы туулган К.М., 2008-жылы туулган Б.М., 2009-жылы туулган К.А., 2008-жылы туулган К.Я. жана 2008-жылы туулган К.А. болушкан. Бардык катышуучулар Аламудун районунун ИИБине алып барылып, териштирүү жүргүзүлгөн.
Териштирүү учурунда 2005-жылы туулган Б.А. никеге туруу максатында, достору менен алдын ала сүйлөшүп, унаа ижарага алып, жашы жете элек К.Х.ны үйүнүн жанынан уурдап кеткендиги аныкталган. Кыздын энеси А.Н. ИИБге кылмышкерлерге чара көрүүнү өтүнүп кайрылган.
Бул факт боюнча Кыргыз Республикасынын Кылмыш кодексинин 172-беренеси (Никеге туруу максатында адам уурдоо) боюнча кылмыш иши козголгон.
Кыргыз Республикасынын Кылмыш-процесстик кодексинин 96-беренесине ылайык, 2005-жылы туулган Б.А., 2001-жылы туулган К.М. жана 1995-жылы туулган А.А. кармалып, убактылуу кармоочу жайга жайгаштырылган.
Иш боюнча зарыл болгон соттук экспертизалар дайындалды, ал эми башка катышуучулар боюнча алардын жаш курактарын эске алуу менен тергөө иштери жүргүзүлүүдө. Тергөө уланууда. ```
