Бишкекте кызды өлтүрүүгө шектүү кармалды, бул тууралуу Ленин районунун Ички иштер башкармалыгынын маалымат кызматы билдирет.
Укук коргоо органдарынын маалыматына ылайык, 26-январда саат 09:01де 102 номерине чалуу келип түшүп, Кулиев көчөсүндөгү мейманканалардын биринде эркек адам кызга бычак менен жаракат бергендиги тууралуу маалымат берилген. Натыйжада, ал окуя болгон жерде көз жумган.
Д.М. жана Р.Э. ортосунда узак мөөнөттүү мамиле болгондугу аныкталды. Окуя болгон күнү, алкоголдук ичимдиктерди ичкенден кийин, алардын ортосунда талаш-тартыш чыккан. Уруш учурунда кыз эркек адамды колуна бычак менен уруп, ал болсо кызды моюнуна бычак менен урган, бул анын өлүмүнө алып келген.
Окуя боюнча Кыргыз Республикасынын Кылмыш кодексинин 122-беренеси (Өлтүрүү) боюнча кылмыш иши козголду. 2002-жылы туулган шектүү кармалып, убактылуу кармоо жайына жайгаштырылды.
