Медиа сүрөтү. Сейф аль-Ислам Каддафи Ливияда өлтүрүлгөн
53 жаштагы Каддафи өз үйүндө белгисиз адамдардын кол салуусунун натыйжасында атып өлтүрүлгөн. Ал 2011-жылы режимдин кулаганына чейин Ливияда эң таасирдүү адамдардын бири болуп, 2021-жылы президенттик шайлоого катышууга аракет кылган.
Каддафинин айланасындагы адамдардын маалыматына ылайык, ал эз-Зинтан шаарында, Триполиден 160 чакырым түштүк-батышта жайгашкан үйүнө кирген төрт куралчан адам менен «түздөн-түз кагылышуу» натыйжасында өлтүрүлгөн.
Каддафинин кеңешчиси ливиялык медиага кол салуучулар видеокөзөмөл камераларын өчүрүп, андан кийин аны өлтүргөнүн билдирди. Бул маалыматты маркумдун үй-бүлөсүнүн адвокаты Марсель Чеккальди да тастыктады.
Ливиялык булактардын маалыматы боюнча, кол салуу Каддафинин резиденциясынын жанындагы бакта болуп, ал жерде олуттуу жаракат алган.
Муаммар Каддафинин башкаруусунда анын экинчи уулу расмий кызматтардын жоктугуна карабастан, өлкөдөгү эң таасирдүү адамдардын бири болгон, деп белгилейт BBC. Ал Ливиянын тышкы саясатында маанилүү роль ойноп, деликаттуу дипломатиялык миссияларды аткарган.
