Милиция тарабынан берилген маалыматка ылайык, аял 5-февралда арыз менен кайрылып, окуя 2022-жылдын 15-октябрында болгонун билдирген. Эркек биринчи кезекте аны сабап, андан кийин бензин куюп, өрттөгөн.
Баштапкы маалыматтарга ылайык, укук коргоо органдары эки жубайдын да күйүк алганын жана алардын оор абалда болгондуктан сурак алынбаганын билдиришкен.
Кийинчерээк, эркек жубайын балдарына зыянын тийгизүү менен коркутуп, болгон окуяны кырсык катары көрсөтүүнү талап кылып, аны шантаждагандыгы белгилүү болду. Аял Бишкекте эки ай бою дарыланган жана чындыкты энесине, күйөөсү кайрадан зомбулук көрсөткөндөн кийин гана айткан.
Бул окуя боюнча "Саламаттыкка оор зыян келтирүү" беренеси боюнча кылмыш иши козголуп, шектүү кармалган.
Омбудсмен институтунун маалыматына ылайык, өрт коюп, жубайын күйгүзгөн эркек Талас шаардык мэриясында иштейт.
Жапа чеккен аялдын күйүктөрү денесинин 60%ын камтып, кайрадан дарылоого муктаж экендиги белгилүү болду. Учурда аял Бишкекте балдары менен бирге.
Ошондой эле, ага медициналык жардамдан тышкары, психологиялык жардам да керек экени айтылууда.
