Жалал-Абад облусунун Тогуз-Торо районунда «Полька» сортундагы малинаны отургузуу боюнча долбоор башталды. Бул тууралуу Кыргызстандын Суу ресурстары, айыл чарба жана өнөр жайды кайра иштетүү министрлиги билдирди.
«30+20+10» инициативасынын алкагында фермер Бакыт уулу Омур 0,50 гектар жерге малина отургузду.
Долбоордун негизги максаты - заманбап технологияларды колдонуу жана жогорку продуктивдүү өсүмдүктөрдү өстүрүү аркылуу жергиликтүү айыл чарба өндүрүүчүлөрдүн кирешелерин көбөйтүү.
Жердин абалын баалоо жана өсүмдүктөрдүн өсүшү үчүн оптималдуу шарттарды түзүү максатында райондук өсүмдүктөрдү коргоо жана химиялаштыруу бөлүмүнүн адистери жер үлгүлөрүн алып, лабораторияга анализге жөнөтүштү.
«Участок толугу менен тосулган, бул эгиндерди терс таасирлерден жана жаныбарлардан коргоону камсыздайт. «30+20+10» долбоору агрардык секторго инновациялык чечимдерди киргизүүгө, региондордо өндүрүштү кеңейтүүгө жана фермерлерди колдоого багытталган», - деп билдиришти министрликтен.
