Кыргызстандын борбору Бишкекте бир нече көчөлөрдө асфальттын сапаты текшерилди. Бул ишти Кыргыз Республикасынын курулуш, архитектура жана турак-жай-коммуналдык чарба министрлигине караштуу республикалык сертификаттоо борборунун алдындагы сынак лабораториясынын адистери жүргүзүштү.
Текшерүү учурунда "Алтын-Ордо" турак жай массивинин аймагында, ошондой эле Мыскал, Безымянная, Илим, Республикалык көчөлөрдө жана Эркиндик бульварында асфальтобетон үлгүлөрү тандалды.
Ведомствонун маалыматы боюнча, көчмө лабораториянын кызматкерлери асфальтобетонду жайгаштыруу учурунда алынган үлгүлөрдү физика-механикалык мүнөздөмөлөр боюнча кийинки анализ үчүн алышты. Алынган натыйжалардын негизинде материалдардын сапаты белгиленген стандарттарга жана талаптарга ылайык келерин баалоо үчүн протокол түзүлөт.
