Бир ата-эне 38-мектепте 18:00дөн кийин өтүп жаткан сабактардын да токтотулганын, окуучулар мектептин аймагын 17:45ке чейин таштап кетиши керектигин белгиледи. Бул кечки сааттарда электр энергиясын берүүдө чектөөлөр менен байланыштуу.
Башка колдонуучулар комментарийлерде Беловодск айылындагы жана Кара-Балта шаарындагы мектептерде да ушундай эле абал бар экенин билдиришти.
Бирок Бишкектин вице-мэри Виктория Мозгачева Kaktus.media менен болгон маегинде окуу процессинин токтотулбай турганын тактады.
Мэрия энергокризисинен улам билим берүү мекемелеринин жабылышы тууралуу ушактарды четке какты.
«Бишкектеги мектептерде окуу процессинин токтотулганы тууралуу маалымат чындыкка дал келбейт», — деп билдиришти мэриядан.
Алар Бишкектеги бардык билим берүү мекемелеринде окуу-тарбия процессинин адаттагыдай режимде, бекитилген окуу пландарына ылайык улантылып жатканын баса белгилешти. Эч кандай сабактар, анын ичинде кружоктор жана класстан тышкы иш-чаралар токтотулбайт.
38-мектептин администрациясы менен абал боюнча түшүндүрүү иштери жүргүзүлдү.
Мэрия шаар тургундарын расмий маалымат булактарына таянууга жана социалдык тармактардагы ушактарга ишенбөөгө чакырды», — деп кошумчалашты мэриядан.
Эскерте кетсек, мурда өкмөт мамлекеттик жана административдик имараттарда 18:00дөн кийин сырткы жарыкты колдонууга чектөөлөр киргизген.
