Бишкек мэриясы жакында болгон өрттөн жабыркаган үй-бүлөлөргө көрсөтүлгөн колдоо боюнча кырдаалды комментарийлеп берди.
Жабыркагандар жардамсыз калгандыгы тууралуу маалыматтардын пайда болушуна жооп катары, мэр Айбек Джунушалиев Чынгыз Айтматов проспектиндеги окуядан жабыркаган тургундар менен жолугушту.
Анын көрсөтмөсү боюнча, биринчи кезектеги жардам уюштурулду: бардык жабыркагандар убактылуу башпаанекке жайгаштырылып, жашоо үчүн зарыл шарттар менен камсыздалды.
Мындан тышкары, жабыркагандар менен болгон жолугушуунун натыйжасында материалдык колдоо көрсөтүү чечими кабыл алынды: 22 үй-бүлөгө мэрдин резервдик фондунан 50 миң сомдон берилди.
«Жоголгон батирлер үчүн компенсация күчүндө болгон мыйзамдарга жана мамлекеттик камсыздандыруу механизмдери аркылуу жүргүзүлөт. Жабыркагандардын ичинен болгону беш батир камсыздандырылган, жана ошолордун ээлери белгиленген нормаларга ылайык компенсация алууга укуктуу», - деп билдиришти мэриядан.
Ошондой эле, мэрдин орун басары Виктория Мозгачева жана Биринчи май районунун башчысы Сарылбек уулу Улан тургундар менен кошумча жайгаштыруу, жардам алуу жана мамлекеттик органдар менен өз ара аракеттенүү боюнча түшүндүрүү иштерин жүргүзүштү.
Учурда жабыркаган үй-бүлөлөр үчүн кошумча колдоо көрсөтүүнүн ар кандай варианттары каралууда. Жайгаштыруу жана кошумча жардам чаралары, ошондой эле мамлекеттик структуралар, анын ичинде Мамлекеттик ипотекалык компания менен өз ара аракеттенүү маселелери белгиленген тартипте каралат.
