Шаардын мэри Айбек Джунушалиев өз сөзүндө, 2024-жылдын майынан баштап мэрия япон компаниясы менен кызматташып, Бишкектин өнүгүү концепциясын иштеп чыкканын эске салды. Бул концепциянын негизинде генплан долбоору түзүлүп, 25-октябрда коомдук талкууга сунушталган.
Шаар башчысынын айтымында, мэрияга генплан боюнча 200дөн ашык расмий сунуштар жана пикирлер келип түшкөн. Эгер ар кандай платформалар аркылуу келген кайрылууларды эске алсак, алардын саны 3 миңден ашат, ал эми сурамжылоолордун алкагында – 10 миңден көп. "Биз социалдык тармактардагы талкууларды байкап, бул долбоор боюнча көптөгөн суроолор жана эксперттик пикирлерди белгиледик", - деп кошумчалады ал.
