Маданият министрлигинин басма сөз кызматы билдиргендей, бул конкурс 2023-2026-жылдарга арналган ODA долбоорунун алкагында уюштурулган, анын максаты «традициялык кол өнөрчүлүк буюмдарын жаратуу жана алардын санариптик маркетинг мүмкүнчүлүктөрүн жакшыртуу аркылуу маданий туризмди өнүктүрүү». Долбоор Кыргызстан менен Кореянын кызматташтыгы менен ишке ашырылууда.
Иш-чаранын жүрүшүндө куттуктоо сөздөрү менен биринчи вице-министр Союзбек Надырбеков, ICHCAP өкүлү Ким Доксун, Кыргызстандагы Корея элчиси Ким Кванчжэ жана ЮНЕСКО боюнча Улуттук комиссиянын жооптуу катчысы Сабира Солтонгелдиева чыгып сүйлөштү.
Конкурстун негизги максаты — традициялык кыргыз орнаменттери жана символикасын заманбап дизайнердик чечимдер менен айкалыштырган инновациялык туристтик продуктыларды жаратуу болду. Конкурска катышуучулар сувенирлер жана күнүмдүк колдонуу үчүн буюмдардын моделдерин сунуштап, жаңы ыкмаларды колдонуу менен традициялык элементтердин маданий маанисин чагылдырууга аракет кылышты.
