Кыргыз делегациясынын курамында Кинематография департаментинин, Т. Океев атындагы «Кыргызфильм» улуттук киностудиясынын, ошондой эле «Кыргызтасмасы» мамлекеттик мекемесинин өкүлдөрү жана «Карек» балдар кинофондунун негиздөөчүлөрү бар эле.
8-9-декабрда өткөн Orient Market кино базарында делегаттар өз долбоорлорун сунуштап, техникалык мүмкүнчүлүктөрдү талкуулап, тартуу үчүн жаңы локацияларды изилдөөгө мүмкүнчүлүк алышты.
Мындан тышкары, Азербайджандын стриминг платформаларында кыргыз фильмдерин көрсөтүү мүмкүнчүлүгү боюнча сүйлөшүүлөр жүргүзүлдү.
Креативдик жумачылык алкагында 9-декабрда түрк тилдүү өлкөлөрдүн өкүлдөрү арасында анимация тармагында кызматташуу боюнча меморандумга кол коюлду. Бул келишим ТЮРКСОЙ уюму жана Түркия анимация ассоциациясы (ATA) тарабынан колдоого алынган, маданий өз ара аракеттенүү жана креативдик индустриялардын келечектери талкууланган тегерек столдун жыйынтыгы болду. Келишимдин негизги максаты — түрк тилдерин жана маданияттарын колдогон сапаттуу анимациялык контентти иштеп чыгуу үчүн бирдиктүү системаны түзүү.
10-декабрда Бакудагы Низами кино борборунда «Кыргыз кино күндөрү» өткөрүлүп, «Кыргызфильм» киностудиясы тарабынан чыгарылган бир нече фильм көрсөтүлдү. Бул иш-чара Кыргызстан менен Азербайджан ортосундагы маданий жана кесиптик байланыштарды бекемдөөгө жардам берди.
Baku Cinema Breeze — бул дүйнөнүн төрт бурчунан кино индустриясынын өкүлдөрүнүн фильмдери, чыгармачылык жолугушуулары жана өз ара аракеттенүүсү үчүн маданий платформа болуп кызмат кылган эл аралык кинофестиваль.
