Үч өлкөнүн кондитерлери биринчи орун үчүн күрөшүштү
Казакстанда өткөн «Chocolatine Kazakhstan – 2025» эл аралык чемпионатында алтын медалды Бишкектеги С. Чокморов атындагы профессионалдык лицейинин өндүрүштүк окутуу устаты Жамиля Жуматаева жана анын окуучусу Ажара Кенешова утушту. Бул маалыматты Билим берүү министрлигинин басма сөз кызматы билдирди.
Чемпионаттагы жеңиш кыргызстандык кондитерлерге 2026-жылы Францияда өтө турган World Chocolatine and Pain au Chocolat Championship'те өлкөсүн көрсөтүүгө мүмкүнчүлүк берди.
Сорунга Казакстан, Кыргызстан жана Өзбекстандан 22 устат катышып, кондитерлик өнөрдө өзүнүн жөндөмдөрүн эки модуль боюнча көрсөтүштү. Катышуучулардын иштерин эл аралык эксперттер баалашты.
«Бул чемпионат Борбордук Азиянын таланттуу жаштарын бириктирип, катышуучулардан жогорку деңгээлдеги чеберчилик, креативдүүлүк жана кесипкөйлүктү талап кылат», — деп белгиленет билдирүүдө.
