Переговорлордун жүрүшүндө кыргыз-турк кызматташтыгынын негизги аспектилери, анын ичинде саясий диалог, соода-экономикалык байланыштар жана маданий инициативалар талкууланды, ошондой эле 2026-жылы өз ара жогорку деңгээлдеги визиттерди уюштуруу пландары каралды.
Элчи Казакбаев түрк тарапка Кыргызстандын Президенти Садыр Жапаровдун жетекчилиги астында жүргүзүлүп жаткан саясий жана экономикалык реформалар тууралуу маалымат берди.
Түркиянын тышкы иштер министринин орун басары Муса Кулаклыка Кыргызстанды Жогорку Кеңешке болгон шайлоолордун ийгиликтүү өткөрүлүшү менен куттуктап, шайлоо процессинин жогорку демократиялык деңгээлин белгиледи.
Мындан тышкары, жолугушууда билим берүү жана медицина тармагындагы кызматташтык, соода көлөмүн жогорулатуу, ошондой эле эки өлкөнүн жарандарынын өз ара сапарлары үчүн шарттарды түзүү маселелери талкууланды. Тараптар Кыргызстандын жана Түркиянын тышкы иштер министрликтеринин ортосунда консулдук консультацияларды өткөрүүнү алдын ала макулдашышты.
Жолугушуунун жыйынтыгы боюнча эки тарап кызматташтыкты тереңдетүү, анын ичинде БУУ жана Түрк мамлекеттеринин уюму сыяктуу көп тараптуу платформаларда өз ара аракеттенүүнү күчөтүү ниеттерин билдиришти.
