Кыргыз Республикасынын Финансылык министрлигинде Кыргыз Республикасынын Финансылык министрлигинин жана Мамлекеттик кадрлар кызматынын кызматкерлеринин Түркия Республикасынан келген делегация менен жолугушуусу болуп өттү. Делегация Түркиянын Финансылык министрлигинин жана Казначейство Секретариатынын өкүлдөрүн, ошондой эле Түркиянын кызматташтык жана өнүктүрүү агенттигин (ТИКА) камтыйт. Финансылык министрдин орун басары, Борбордук казначейликтин директору Алмаз Бакетаев түрк кесиптештерине семинар учурунда жүргүзүлгөн иши үчүн ыраазычылык билдирди жана Кыргыз Республикасынын Финансылык министрлиги тууралуу алардын биринчи таасирлери жана ниеттерин сурады.
Түрк кесиптештер үчүн Кыргыз Республикасынын учурдагы финансылык системасын изилдөө жана мамлекеттик финансыларды башкарууда процесстерди автоматташтыруу боюнча кыргыз тараптын муктаждыктарын талдоо үчүн семинар 2014-жылдын 20-24-октябры аралыгында өткөрүлдү.
Бул убакыт аралыгында Финансылык министрликтин кызматкерлери өздөрүнүн учурдагы ишин жана аны эл аралык эсеп жана отчет стандарттарын колдонуу менен оптималдаштырууга болгон көз карашын жеткиликтүү түрдө сунушташты. Бишкек шаарындагы регионалдык казначейликке визиттер уюштурулду, ошондой эле келечектеги долбоор үчүн ИТ-инфраструктура сунушталды. Мындан тышкары, Кыргыз Республикасынын Мамлекеттик кадрлар кызматы мамлекеттик башкарууда адам ресурстарын башкаруу боюнча реформалар тууралуу маалымат берди.
Түрк кесиптештер семинарды уюштуруунун жогорку деңгээлин жана сунушталган материалдардын сапатын белгилешти жана алынган маалымат Кыргыз Республикасындагы бюджет процесси боюнча толук циклды оптималдаштырууга "жол картасын" түзүүгө жардам берерин билдиришти.
Бакетаев А. К. бул "жол картасы" сөзсүз түрдө оң кадам болоорун, анткени кабыл алынган жана эл аралык финансылык институттарга сунушталган мамлекеттик финансыларды башкарууда процесстерди автоматташтыруу боюнча иш-аракеттер планына ылайык, Финансылык министрлик ушул жылдын декабрында мамлекеттик финансыларды башкаруу боюнча келечектеги маалыматтык системага алдын ала Техникалык тапшырма жана Техникалык-экономикалык негиздемени иштеп чыгышы керектигин белгиледи. Ошондуктан, түрк кесиптештеринин практикалык тажрыйбага негизделген комментарийлери келечектеги иште пайдалуу жардам болот.
Түрк тарап Кыргыз Республикасынын Финансылык министрлигинин реформаларын колдоого даяр экенин билдирди жана төрт жума ичинде жогоруда аталган "жол картасынын" долбоорун Финансылык министрликке расмий түрдө сунуштоо чечими кабыл алынды. Ошол эле учурда тараптар бул жаңы жолдун башталышы гана экенин жана коюлган максаттарды ишке ашыруу үчүн мындан ары да максаттуу биргелешкен кызматташтык керек экенин белгилешти.
