Маданият министрлигинин маалымат кызматынын билдирүүсүнө караганда, бул фильм быйыл фестивалда Борбордук Азиянын жалгыз өкүлү болуп калды. «Курак» Латин Америкасы, Чыгыш Европа, Германия, Испания жана Түштүк Кореядан келген 14 башка фильм менен бирге негизги конкурс программасына катышат. Бул фильмдин Түштүк Америкадагы дебюту болот.
Фильм Кыргызстан, Швейцария, Сербия, Франция, Нидерланд, Люксембург жана Италиянын биргелешкен долбоору болуп, азыркы Кыргызстандагы зомбулук жана мыйзамсыздыкка туш болгон үч аялдын айкалышкан окуяларын баяндайт. Режиссерлор социалдык маанилүү маселелерди көтөрүү менен көркөм реализм, нуар жана документалдык кино элементтерин колдонушат.
Bogocine — Латин Америкасындагы эң белгилүү жана эски кинофестивалдардын бири, 1984-жылы негизделген. Ал жаңы режиссерлордун дебюттук толук метраждуу фильмдерин көрсөтүү үчүн маанилүү платформа болуп саналат. Бул фестивалда Педро Альмодовар, Пон Джун Хо, Исабель Койшет, Алехандро Иньярриту жана Родриго Гарсия сыяктуу белгилүү режиссерлор сыйлыктарды алышкан.
