Фильм «Курманжан Датка» тапшырылды заказчыга

Бишкек шаарында, «Манас» кинотеатрында 13-августта «Курманжан Датка» фильмин өндүрүштөн өткөрүп берүү иш-чарасы Кыргызстандын Маданият, маалымат жана туризм министрлигине өткөрүлдү. Бул тууралуу министрликтин басма сөз кызматы билдирди.

Фильмдин кабыл алынышы президенттин Аппаратынын, өкмөттүн Аппаратынын, Жогорку Кеңештин, Кинематография департаментинин, «Кыргызфильм» улуттук киностудиясынын өкүлдөрүнүн, көркөм кеңештин мүчөлөрүнүн, эксперттик кеңештин мүчөлөрүнүн, ошондой эле кино тармагындагы көрүнүктүү ишмерлердин катышуусунда өттү.

Фильм көрсөтүлгөндөн кийин талкуу болуп, «Курманжан Датка» тарыхый-эпикалык фильм болуп, Курманжан Датканын жашоосу жана ишмердүүлүгү, кыргыз элинин тарыхы тууралуу баяндайт. Фильм өз максатына жетип, мамлекет үчүн маанилүү болуп калгандыгы белгиленди.

Ошондой эле, фильм бөлүнгөн каражаттардын чегинде тиешелүү деңгээлде тартылганы айтылды, деп билдирди басма сөз кызматы. Актерлор Н.Мамбетова, Э.Абай кызы, Ж.Сейдакматова, А.Мурадилаев жана башкалардын чыгармачылык салымы, М.Алиев жетекчилигиндеги оператордук топтун кесипкөйлүгү, режиссердун, композиторлордун, ошондой эле жаш операторлордун, «Кыргызфильм» жана «Айтышфильм» студияларынын кызматкерлеринин мыкты иши белгиленди.

Мурда маалымдалгандай, фильмдин улуттук премьерасы 31-августта «Манас» кинотеатрында расмий адамдардын, кеңири коомчулуктун, маданияттын көрүнүктүү ишмерлеринин, демөөрчүлөрдүн, чет өлкөлүк коноктордун жана ЖМКнын катышуусунда өтөт.

Учурда республиканы кино менен камсыз кылуу, анын ичинде жеткиликтүү эмес аймактардын тургундары үчүн, ошондой эле каражаттарды кайтаруу максатында фильмдин республикалык прокатын ишке ашыруу боюнча иш-чаралар өткөрүлүүдө, деп билдирди Маданият министрлиги.

Министрликте жогоруда аталган иш-чараларды өткөрүүдө жергиликтүү администрациялардын колдоосуна ишенишет.