"Регион 13" фильмине прокатка тыюу салуу чечими анын Кыргызстандагы премьера күнү "Айкол Ала-Тоо" коомдук бирикмесинин өкүлдөрүнүн талабынан улам кабыл алынды. Уюм казакстандык кинотуулду кыргызстандыктар үчүн уяттуу деп эсептешти, анткени анда 7-апрелдеги окуялардын катышуучулары Курманбек Бакиевди кулатканда психотроптук препараттарды колдонушкандыгы тууралуу айтылат, деп билдирет Радио Азаттык.
– Фильмдин трейлеринде 7-апрелде жана июнь окуяларында жигиттер психотроптук заттарды колдонушкандыгы айтылат. Бул биздин сотко кайрылуубузга негиз болду. Фильм апрель окуяларында каза болгон адамдардын арбагына көө түшүрөт. Эч кимдин абалды дестабилизациялоого укугу жок. Мындай фильмдер Кыргызстанда көрсөтүлбөшү керек, – деди "Айкол Ала-Тоо" бирикмесинин жетекчиси, депутат Мээрбек Мискенбаев.
Депутат белгилегендей, анын бирикмесинде эч ким фильмди көргөн эмес, бирок Интернетте жайгаштырылган трейлер алар үчүн фильмдин аморалдуу экенин түшүнүүгө жетиштүү болду. Өз кезегинде "Регион 13" фильмдин продюсери Шайырбек Маматокторов соттун фильмди көрсөтүүгө тыюу салганына таң калып жатат, анткени бул фильм Кыргызстандагы апрель окуяларына түздөн-түз байланыштуу эмес.
– Фильмдин идеясы казакстандык режиссерлорго таандык. Алар бул картинаны Украина жана Кыргызстандагы окуялардын кайталанбашы үчүн эскертүү катары түзүштү. Сценарий Казакстандын маданият министрлиги тарабынан бекитилген. Бирок кандай болгон күндө да, 2010-жылдагы окуялар тууралуу ачык сүйлөшүшүбүз керек, – деди журналисттерге Радио Азаттыкка Маматокторов.
Продюсер ошондой эле фильмде психотроптук заттар тууралуу айтылган эпизод болгонун, бирок "Кыргызфильмдин" суранычы боюнча Кыргызстанда прокатка чыгарылардан мурун ал эпизоддор кесилип алынганын кошумчалады.
"Регион 13" фильми Казакстандык жашоочулардын "түстүү" революцияны алдын алуу аракеттери тууралуу баяндайт, аны бир катар чет элдик өкмөттүк эмес уюмдардын жардамы менен чет элдик күчтөр уюштурууга аракет кылышат. Революцияны болтурбоо операциясын Оңтүстік Казакстанда белгилүү криминалдык авторитет Багдат өзүнө алат.
