Токарев Александр Дмитриевич
Кинорежиссер. 1907-жылдын 22-июнунда Ростов облусунун Морозовск шаарында төрөлгөн, 1975-жылы Фрунзе шаарында дүйнөдөн өткөн. 1925-жылы орто мектепти аяктаган соң театр жана кино менен алектенген. «Ювгоскинокомсомол» өндүрүшүндө «Приказ № ...» фильминде эпизоддук рольдо тартылган. Ар кандай театрларда иштеп жүрүп, ВУФКУда: Г. Стабовойдун «Жемчужина Семирамиды» (1929), И. Кавалеридзенин «Ливень» (1929), А. Довженконун «Арсенал» (1929) жана башка фильмдерде кичинекей ролдорду ойногон. 1930—1934-жылдары ВГИКтин актердук факультетинде окуган. Окуу учурунда жана институттан кийин эпизоддук ролдорду ойноп жүргөн: А. Ляшенконун «Волчьи тропы» (1931) фильминде жана башка фильмдерде.
1938-жылдан тарта А. Токарев «Сибтехфильм» студиясында режиссерлук кесипти үйрөнө баштайт. Улуу Ата Мекендик согуш учурунда Кызыл Армиянын катарында болгон. 40-жылдардын аягында жана 50-жылдардын биринчи жарымында ар кандай өздүк театрдык топторду режиссер катары жетектеген.
1957-жылы А. Токарев Фрунзе художестволук жана хроникалуу-документалдык фильмдер студиясында художник-гример катары иштей баштайт. Кыска убакыттан кийин режиссердун ассистенти болуп, 1960-жылы хроника режиссеру болуп дайындалат. 1958-жылдан тартып «Советская Киргизия» киножурналын мезгил-мезгили менен чыгарууга киришет. 1961-жылы 12 номерин монтаждаган. 1962-жылы монтаж цехинин начальниги болуп иштеген.
А. Токаревге «В нашем горном крае» (1963), «Змееловы» (1965), «Рыба Киргизии» (1967), «Эркин-Тоо» (1967), «Увлекательное путешествие» (1968) фильмдери таандык.
1962-жылдан тарта СССР СКнын мүчөсү.
