Берилген маалыматка ылайык, бул куткаруу иштерин жүргүзүү үчүн атайын топ түзүлгөн.
«Көп кар жаашы Толук айылдык аймагында Жара-Өтөк, Шаркыратма, Жампа, Өргө, Төнчү, Кызыл-Кырчын, Темиркен, Чолок, Татыр, Кабылан, Кара-Күнгөй, Тартма кышкы жайлоолорунда транспорттук кыймылды токтотту. Ошондуктан малды жайытка чыгаруу мүмкүн болбой калды. Натыйжада 13 чарбадан 26 жарандын кыштоолорунда малдары менен блоктолуп калгандыгы тууралуу маалымат түштү», — деп айтылат билдирүүдө.
Бул адамдарды эвакуациялоо үчүн 22-декабрда, автотранспорт менен жетүү мүмкүн болбой калганда, 50 адам ат менен жөнөтүлдү. Жүргүзүлгөн чаралардын натыйжасында ошол эле күнү саат 18:00гө карата айылга 4 чарбадан 9 адам жана 2 миң 194 баш мал жеткирилди.
Азыркы учурда дагы 3 чарбадан малдын жолдо экендиги белгилүү. 6 чарбадан ээлеринин кыштоолорду таштап кетүүгө ниеттенбеген себептери аныкталууда», — деп кошумчалашты администрациядан.
Мындан тышкары, Толук айылдык аймагындагы ички жолдорду жана айылдарды байланыштырган жолдорду тазалоо үчүн 3 бирдик техника тартылды: 2си №23 жол эксплуатациялоо ишканасынан жана бири айыл өкмөтү тарабынан келишимдик негизде берилди.
