Алардын айтымында, Чий-Талаа айылында жайгашкан бала бакча 2025-жылдын 31-августунда ачылган жана №41 «Акпари эне» деген аталышты алган. Бирок, бул аталыш коомдук резонанс жаратты, анткени ал билим берүү тармагына тиешеси жок, азыркы учурда жашаган адамга таандык. Айыл тургундарынын белгилөөсү боюнча, аталыш бала бакчанын курулушуна колдоо көрсөткөн демөөрчүнүн энесинин урматына берилген.
Айылдын тургундары мекемеге нейтралдуу аталыш — «Чий-Талаа» берилиши керек деп эсептешет. Үч-Дөбө-Алай айылдык аймагынын айыл өкмөтүнүн башчысы Мустафа Жаныбеков, тургундар бул маселени мурда да көтөргөндүгүн билдирди. «Учурда бала бакча иштеп жатат. Менин кызматка дайындалганымга чейин айылдык кеңеш тарабынан тиешелүү токтом кабыл алынган, ошол боюнча аталыш берилген. Эгерде айылдык кеңештин жыйыны өткөрүлсө, биз аталышты өзгөртүү боюнча сунуш киргизебиз», - деди ал.
Ошондой эле, Алай райондук билим берүү бөлүмүнүн жетекчиси Болот Таиров, бала бакчанын аталышын өзгөртүү маселеси айыл өкмөтүнүн жана айылдык кеңештин депутаттарынын компетенциясында экенин түшүндүрдү. «Бул маселени чечүү үчүн айыл өкмөтүнө тиешелүү токтом кабыл алынышы керек. Биз бул боюнча расмий каттарды жөнөттүк, кырдаал көзөмөлдө. Министрлер кабинетинин токтомуна ылайык, билим берүү мекемелерине билим берүү тармагында эмгеги сиңген жана белгилүү адамдардын аттары берилет. Жашаган адамдын атын берүү мүмкүн эмес. Бул анын өлгөн күнүнөн кийин беш жылдан кийин гана мүмкүн», - деди ал.
Бала бакча 50 орунга ылайыкташтырылган, бирок учурда анда 87 бала тарбияланууда.
