Чүй облусунда мал базарлары боюнча бирдиктүү саясат ишке ашырылат. Бул тууралуу президенттин аймактагы ыйгарым укуктуу өкүлү Азамат Осмонов облустук жыйындын жүрүшүндө билдирди.
Ал жеке мал базарларынын ишин тартипке салуу пландалып жатканын, эгер ишкерлер алардын туура иштешин камсыз кыла албаса, муниципалдык мал базарлары түзүлөөрүн белгиледи.
«Мисалы, Кемин районунда жаңы мал базарынын курулушу жүрүп жатат. Чүй районунда 10 күндүн ичинде бардык талаптарга жооп берген убактылуу базар уюштурулду. Ошол эле учурда Токмоктогу мурдагы мал базары абдан начар абалда болчу. Мен ошондой эле Сокулук районундагы муниципалдык базарга бардым, ал жакта да абал идеалдуу эмес. Малдын кыймылы жана ветеринардык көзөмөл жакшы эмес, тарифтер түшүнүксүз. Бул баары тартипке салууну жана акча которууларды киргизүүнү талап кылат», - деп кошумчалады Осмонов.
Ошондой эле, белгиленген стандарттарга жооп бербеген мал базарлары жабылат. Ветеринардык жана санитардык көзөмөл милдеттүү болуп, базарларда малдын кыймылы так эсептелиши керек.
«Мурда жеке мал базарлары ветеринардык, санитардык жана экологиялык нормаларга жооп бербесе да иштеп жатышты. Мен муну көзөмөлсүздүк катары карайм, бул өз кезегинде коррупциянын формасы болушу мүмкүн, ал иштебөөдө көрүнөт», - деп баса белгиледи ал.
Мындан тышкары, мал жана соода базарларынын айланасындагы токтоочу жайларды этап-этабы менен цифрлаштыруу, QR-коддорду жана автоматташтырылган акча төлөө системаларын киргизүү ишке ашырылат.
Эске салсак, өткөн жылы Токмоктогу жеке мал базары ветеринардык, санитардык жана экологиялык талаптарга жооп бербегендиктен жабылган. Убакытча ыңгайлуулук үчүн Чүй районунун Виноградное айылында мал базары уюштурулган.
Ошондой эле жыйындын жүрүшүндө Кемин районунун акими Кутпидин Шакиров Чым-Коргон айыл өкмөтүндөгү заманбап мал базарынын курулушун мүмкүн болушунча тез арада аяктоо пландалып жатканын жана ал эксплуатацияга берилээрин билдирди. ```
