Жогорку Кенештин өнөр жай саясаты, транспорт, энергетика, архитектура жана курулуш боюнча комитетинин жыйынында көпквартирдүү үйлөрдүн жашоочулары жана жашоого арналган эмес жайлардын ээлеринин коомдоштуктарына байланыштуу мыйзам долбоору колдоо тапты.
Юстиция министринин биринчи орун басары Алмазбек Зарылбек уулу сунушталган өзгөртүүлөр ТСЖнын ишин жакшыртууга багытталганын белгиледи. Атап айтканда, мыйзам долбоорунда кол коюу жасалмалыгын алдын алуу, үчүнчү жактардын мыйзамсыз катышуусун жоюу, ошондой эле кворумду жана кабыл алынган чечимдердин легитимдүүлүгүн аныктоо тартибин тактоо боюнча чаралар каралган.
Ал ошондой эле ТСЖны нотариалдык түрдө күбөлөндүрүлгөн документтер негизинде каттоо талаптары маанилүү жаңылык экенин белгиледи. Бул жаңылык алардын ишмердүүлүгүнүн ачыктыгына жогорулатууга жана жашоочулардын укуктарын коргоого жардам бериши керек.
